Vladimir Smirnov

Vladimir Mikhajlovitsj Smirnov (fødd 7. mars 1964) er ein tidlegare langrennsløpar frå Kasakhstan, som blant nordmenn fekk kallenamnet Smirre. Han debuterte internasjonalt som skiløpar under VM i Davos i 1982. Sidan har han delteke i mange internasjonale skitevlingar, og var ofte ein arg konkurrent til Bjørn Dæhlie.

Vladimir Smirnov
Verkeleg namn	Владимир Михайлович Смирнов
Fødd	7. mars 1964 (56 år) Shchuchinsk
Yrke	langrennsløpar
Vladimir Smirnov på Commons

Skikarriere

Smirnov har vunne ei rekkje medaljar i karrieren sin. Under Vinter-OL 1988 i Calgary vann han sylv på 30 km og bronse på 15 km. Under Vinter-OL 1994 på Lillehammer vann han gull på 50 km - dette var Kasakhstan sin fyrste olympiske gullmedalje. Under same OL vann han sylv på både 10 km og 15 km. I 1994 vart han tildelt Holmenkollmedaljen saman med Ljubov Jegorova og Espen Bredesen for skiprestasjonane sine.

Smirnov vann også VM-gull på 30 km, 15 km og 10 km i 1995, og VM-sylv på 15 km og 10 km i 1993, samt bronse på 30 km i same meisterskapen. Han har VM-bronse på 15 km og 30 km frå 1991, samt 50 km frå 1995. Smirnov vann verdscupen samanlagt i 1991 og 1994 og har 30 einskilde sigrar i verdscupen. Han deltok også i Vinter-OL 1998 i Nagano, men har vart ein tredjeplass på 25 km den beste prestasjonen hans.

Anna

Etter at han la opp som skiløpar var han Kasakhstan sitt medlem i IOC (den internasjonale olympiske komitéen) frå 1999 - 2001. Deretter var han medlem i IOC sin atlet-kommisjon frå 1998 - 2004. Smirnov var også leiar for kommitéen som kjempa for å få Vinter-OL 2014 til Alma Ata i Kasakhstan, men bodet vart avvist i 2006. Han har også vore ein av visepresidentane i International Biathlon Union (det internasjonale skiskytingsforbundet).

Smirnov deltok også i TV 2-programmet Gutta på tur, saman med Bjørn Dæhlie, Vegard Ulvang, Arne Brimi og Arne Hjeltnes då dei reiste på tur i Kasakhstan.

Smirnov bur i dag i Sundsvall i Sverige som svensk statsborgar saman med familien sin.

Kjelder

• Wikipedia på bokmål og engelsk om Smirnov.
• Biografi på sports-reference.com
• Resultatliste hjå FIS.
• Gutta på tur på Filmfront.no
• Engelsk intervju på sportsillustrated.com