Bjarne Fidjestøl

Bjarne Fidjestøl (30. september 1937–9. februar 1994) var ein norsk filolog og omsetjar med stilling som professor i norrøn filologi ved Universitetet i Bergen.

Bjarne Fidjestøl
Statsborgarskap	Noreg
Fødd	30. september 1937
Død	9. februar 1994 (56 år)
Yrke	omsetjar, professor

Liv

Fidjestøl var fødd i Hægebostad kommune som son av presten Alfred Fidjestøl. Då han var to flytta familien til Luster, der han fekk oppveksten sin. I 1952 busette dei seg på Nærbø på Jæren. Fidjestøl studerte i Oslo før han blei tilsett ved Universitetet i Bergen. Han var tilsett ved Nordisk institutt på UiB frå 1969, som dosent frå 1975 og professor frå 1982 til han døydde brått i 1994. Han redigerte Syn og Segn frå 1969 til 1973 og var representant for universiteta i Norsk Språkråd.

Fidjestøl gifta seg med Eva Eimhjellen og fekk fire barn. Gjennom livet hadde han fleire lange studieopphald i utlandet; på Island, i Freiburg, Cambridge og Strasbourg.

Akademisk virke

Fidjestøl fekk tittelen Cand.philol. ved Universitetet i Oslo i 1966 etter å ha studert russisk, fransk og nordiske språk. Han blei Dr.philos. ved Universitetet i Bergen i 1981 med avhandlinga Det norrøne fyrstediktet.

Fidjestøl studerte eventyr og norrøne soger, men særleg norrøne kvad. Han gjorde mykje arbeid med kenningar og tidfesting av eddadikta.

Han omsette fleire verk, hovudsakleg soger frå norrønt, men òg frå russisk og engelsk.

Kjelder

• Personarkiv ved UiB
• Bjarne Fidjestøl Arkivert 2014-06-30 ved Wayback Machine. av Odd Einar Haugen
• In memoriam Bjarne Fidjestøl (PDF) av Margaret Clunies Ross