Melodi Grand Prix 1977

Melodi Grand Prix 1977 var den 17. utgåva av Melodi Grand Prix, Noregs nasjonale uttaking til Eurovision Song Contest. Av 348 innsendte låtar gjekk seks av dei til finalen 19. februar 1977. Vinnarlåten blei «Casanova», sungen av Anita Skorgan, og komponert av Svein Strugstad med tekst av Dag Nordtømme. I den internasjonale finalen i London enda «Casanova» på ein delt 14. plass med 18 poeng.

Melodi Grand Prix 1977
Dato
Finale	19. februar 1977
Vertskap
Finale	Studio 2, NRK Marienlyst, Oslo
Programleiar	Vidar Lønn-Arnesen
Kringkastar	Norsk rikskringkasting
Deltakarar
Deltakarar	22 (6 i finalen)
Vinnar
Song	«Casanova»
Artist	Anita Skorgan
Resultat i Eurovision Song Contest 1977
Finalepoeng	18
Finaleplass	14.
Noreg i Eurovision Song Contest
Melodi Grand Prix 1976 Melodi Grand Prix 1978

Sendinga

Finalen blei sendt frå Studio 2 på NRK Marienlyst laurdag 19. februar 1977 med Vidar Lønn-Arnesen som programleiar. Som NRK ofte gjorde på 1970-talet, blei programmet spelt inn seint på ettermiddagen og sendt i opptak om kvelden. Dette var også første gong finalen blei sendt i stereo, men berre på radio.

Etter kritikken og dei dårlege plasseringane åra før valde NRK ei ny løysing for å plukke ut dei seks finalemelodiane. Landet blei delt inn i fem regionar knytt til nokre av NRK sine distriktskontor. Dei som ønskte å sende inn bidrag, måtte sende dei til det lokale distriktskontoret sitt. Til saman kom det inn 348 bidrag, nesten tre gongar fleire enn i 1975. Lokale juryar gjorde så eit utval: Seks songar på Austlandet, og fire i kvar av dei andre regionane. Songane blei sidan presentert i distriktssendingar på radio. Lyttarane kunne røyste på favorittsongen sin ved å sende inn postkort, og alle dei regionale vinnarane gjekk til finalen i Oslo. Austlandet fekk også sende andreplassen på grunn av folketalet i regionen.

Artistane blei akkompagnerte av Kringkastingsorkestret under leiing av Carsten Klouman. Den klare vinnaren blei «Casanova», framført av Anita Skorgan. Sigeren blei Skorgan sitt definitive gjennombrot i norsk musikkliv.

Resultat

Nr.	Tittel	Artist	Komponist	Tekstforfattar	Poeng	Plass
A	«Robåtrock»	Rune Larsen	Nils Abrahamsen og John Steffensen	Øyvind Pedersen	59	2
B	«Jonathan»	Dag Spantell	Erik Jarlsby og Torkjell Rygnestad		42	5
C	«Make Love, Not War»	Odd Børre	Kåre Grøttum	Bjørn Rønningen	25	6
D	«Casanova»	Anita Skorgan	Svein Strugstad	Dag Nordtømme	91	1
E	«Ikke mitt bord»	Axel Gran	Axel Gran		55	4
F	«Sang»	Benny Borg og Kirsti Sparboe	Mette Hurlen		58	3

Avstemming

Det var seks regionale juryar, kvar med elleve medlemmar. Jurymedlemmane var mellom 16 og 60 år, og rundt halvparten var under 25 år. Det var omtrent like mange kvinner som menn i juryane.

Jurymedlemmane hadde fem røyster kvar å fordele som dei sjølv ønskte – unntatt bidraget frå eigen landsdel. Sidan Austlandet hadde to songar i finalen, oppretta NRK ein ekstra jury på Lillehammer som heimejury for «Sang», sidan Mette Hurlen budde utanfor Oslo. «Make Love, Not War» fekk Oslo som heimejury, sidan Grøttum og Rønningen budde i Oslo.

Nr.	Tittel	Tromsø	Trondheim	Bergen	Kristiansand	Lillehammer	Oslo	Totalt
A	«Robåtrock»	14	15		10	2	18	59
B	«Jonathan»	11	5	3		16	7	42
C	«Make Love, Not War»	3	8	3	8	3		25
D	«Casanova»	13		12	30	32	4	91
E	«Ikke mitt bord»		6	32	1	2	14	55
F	«Sang»	14	21	5	6		12	58

Hendingar

Heller ikkje dette året var pressa særleg positiv til nivået på finalen, men like fullt blei vinnaren svært populær i Noreg. «Casanova» låg heile 15 veker på VG-lista med ein 4. plass som høgaste notering. Det var første gong på seks år at ein vinnar av Melodi Grand Prix gjekk inn på VG-lista.

Melodi A, «Robåtrock», skulle eigentleg ha blitt framført av Helge Nilsen, men han måtte melde pass kort tid før finalen. I staden steppa Rune Larsen inn. Den svingande framføringa hans fall ikkje i god jord hos ein del kristne, og i etterkant av finalen fekk Larsen «masse kjeft og brev frå kristenfolket».

Finalen blei den siste for to bautaer i norsk Melodi Grand Prix på 1960-talet: Kirsti Sparboe og Nora Brockstedt, som deltok i semifinalen. Brockstedt, då 54 år, var den eldste artisten som nokon gong hadde vore med, ein rekord som seinare ble slått av Jahn Teigen i 2005, av Wenche Myhre i 2009, og igjen av Bobby Bare i 2012.

Sørlandet var ramma av eit kraftig snøfall denne laurdagen, med brøytekantar på opptil 7–8 meter enkelte stader. Den eine jurymedlemmen frå Haugesund kom seg så vidt fram til distriktskontoret i Kristiansand. Flyet ho flaug frå Sola til Kjevik, måtte lande på Lista, og derfrå måtte ho ta buss til Kristiansand.

Semifinalane

Kvar landsdel heldt ein lokal semifinale før finalen. Radiolyttarane røysta fram ein vinnar per postkort. Austlandet fekk sende både 1. og 2. plassen på grunn av folketalet i regionen. Resultatet er ikkje fullstendig.

Semifinale 1 – Nord-Noreg

Nr.	Tittel	Artist	Komponist	Tekstforfattar	Røyster	Plass
1	«Luta lei»	Kirsten Lyngedal	Jarle Okstad		172	3
2	«Ro i motvind»	Kirsten Lyngedal	Axel Gran		45	4
3	«Tvilen er vårt liv»	Turid Pedersen	Kjell Pettersen		212	2
4	«Ikke mitt bord»	Turid Pedersen	Axel Gran		235	1

Semifinale 2 – Midt-Noreg

Nr.	Tittel	Artist	Komponist	Tekstforfattar	Røyster	Plass
1	«Salomo»	Supergruppa	Gunnar A. Berg	Berg Sr.	484	2
2	«Du var alene»	Supergruppa	Svein Strugstad	Dag Nordtømme	ukjent	3
3	«Casanova»	Supergruppa	Svein Strugstad	Dag Nordtømme	601	1
4	«Hva nå?»	Supergruppa	Eirik Lie		ukjent	4

Det kom inn 43 bidrag til Midt-Noregs semifinale. Supergruppa, ei spesielt samansett gruppe av profesjonelle musikarar, song alle songane. 1543 røyster kom inn.

Semifinale 3 – Vestlandet

Nr.	Tittel	Artist	Komponist	Tekstforfattar	Røyster	Plass
1	«Tidig»	Brødrene Thue	Ove Thue		552	2
2	«For seint»	Ellen M. Johansen	Bernt Erik Tylden		78	4
3	«Robåtrock»	Rune Larsen	Nils Abrahamsen og John Steffensen	Øyvind Pedersen	558	1
4	«Vi trenger kjærlighet på jord»	Brødrene Thue	Johannes Kleppevik		228	3

Det kom inn 48 bidrag til Vestlandets semifinale.

Semifinale 4 – Sørlandet

Nr.	Tittel	Artist	Komponist og tekstforfattar	Røyster	Plass
1	«Går her og håper»	Hans Petter Hansen	Lars Christian Sande	ukjent	2
2	«Storbyjungel»	Magne Høyland	Ukjent	ukjent	ukjent
3	«Jonathan»	Hans Petter Hansen	Erik Jarlsby og Torkjell Rygnestad	ukjent	1
4	«Mellomspill i regn»	Magne Høyland	Ukjent	ukjent	ukjent

414 røyster kom inn i sørlandssemifinalen. Detaljane er ikkje kjende, anna enn at «Jonathan» vann med klar margin.

Semifinale 5 – Austlandet

Nr.	Tittel	Artist	Komponist	Tekstforfattar	Røyster	Plass
1	«Poker»	Kirsti Sparboe og Benny Borg	Frode Thingnæs	Philip Kruse	ukjent	3
2	«Mærra hass Ka'l»	Nora Brockstedt	Helge Stenersen		ukjent	5
3	«Det er hans land»	Kirsti Sparboe	Kristian Lindeman	Jan Eggum	ukjent	4
4	«Make Love, Not War»	Benny Borg	Kåre Grøttum	Bjørn Rønningen	ukjent	1
5	«Sang»	Kirsti Sparboe og Benny Borg	Mette Hurlen		ukjent	2
6	«Springaren»	Nora Brockstedt	Petter Hurlen		ukjent	6

Rundt 200 av dei innsendte songane kom frå Austlandet. Omtrent 1300 røyster kom inn, men her blei lyttarane bedne om å røyste på to songar. Det fulle resultatet er ikkje kjend, berre at vinnaren og andreplassen fekk rundt 25 prosent kvar av røystene.