Norsk Data

	Norsk Data
	;
	;
Skipa	1967
Hovudkontor	Oslo
Land	Noreg
Produkt	minidatamaskin
Grunnleggjar(ar)	Lars Monrad-Krohn, Per Bjørge, Rolf Skår

Norsk Data (ND) var ein minimaskinprodusent med hovudkontor i Oslo. Føretaket var til frå 1967 til 1992 og var mest aktiv frå tidleg på 1970-talet til midten av 1980-talet.

To Nord-10 maskinar fotografert i lokale på NTNU.
*Foto: Jens Ådne Rydland*

Historie

Opphavet åt ND går attende til utviklinga av digitale datamaskinar ved Forsvarets forskingsinstitutt på Kjeller kor fleire tidlege datamaskinar vart laga, så som SAM og SAM 2 (også kjent som FLINK).

På grunn av framgangen frå denne utviklinga blei A/S Nordata - Norsk Data Elektronikk oppretta 8. august 1967 av Lars Monrad Krohn, Per Bjørge og Rolf Skår.

Selskapet vart ein signifikant leverandør av minimaskinar til mange forskingsprosjekt, og spesielt til CERN i Geneve der det blei valt som leverandør til eit partikkelakseleratorprosjekt. ND hadde òg ein stor kontrakt med Singer for ein leveranse av datamaskinar til flysimulatorar som F-16-simulatoren.

ND var ein stor leverandør til offentleg sektor i Noreg så vel som til universitet og andre innan utdanningssektoren. Men også private verksemder stod på kundelista, til dømes: Det Norske Meteorologiske Institutt, Jonas Øglænd, Kreditkassen, Norsk Tipping, Mobil Exploration Norway Inc, Elf Aquitaine, Stavanger Aftenblad og Kongsberg Våpenfabrikk.

Etter ei lengre tid med stor suksess starta ND daudspiralen tidleg på 1990-talet, i stor grad på grunn av at dei ikkje hadde sett for seg kva innverknad PC-en ville ha på marknaden og sterkare konkurranse frå unixmaskinar.

Norsk Datas teknologi blei vidareført av Dolphin.

Maskinvare

Signifikante Norsk Data datamaskinmodellar var:

Nord-1, 16-bit minimaskin utgjeven i 1968, køyrde TSS (sjå under) frå 1971
Nord-5, 32-bit supermini utgjeven i 1972
Nord-9
Nord-10, 16-bit mini utgjeven i 1973
Nord-10S
Nord-50, andre generasjon 32-bit supermini i 1975
Nord-100, 16-bit, frå 1978
Nord-100/CE
ND-100 Compact, siste leveranse 2001
ND-120CX
ND-Satellite
ND-500, tredje generasjon 32-bit supermini i 1981
ND-505, 28-bit-maskin tillaten gjennom austblokk-embargoen
ND-510/CX
ND-520
ND-540
ND-570/CX, verdas raskaste 32-bit supermini i 1983, 7.1 Whetstone MIPS
ND-5000, fjerde generasjon 32-bit supermini i 1987
ND-5700
ND-5850, femte generasjon 32-bit supermini i 1987
ND-5904

Programvare

Norsk Data tilbaud òg eit utval av system- og brukarprogramvare:

TSS – Nord tidsdelingssystem frå 1971
SINTRAN – operativsystem for Nord 10 og seinare modellar, versjon III frå 1973, III/VS i 1974
SIBAS database i 1975
Fortran-kompilator
BASIC-kompilator
Cobol-kompilator
Pascal-kompilator utvikla i Kiel, Tyskland
QED – linjeorientert teksthandsamingsprogram
PED – sideorientert teksthandsamingprogram
NOTIS – integrert teksthandsaming- og databasepakke

Verd å notere: Verdsveven oppstod då Tim Berners-Lee skreiv Enquireprogrammet på ein SINTRAN III minimaskin i CERN.

Bakgrunnsstoff

Computer-Archiv - Norsk Data