Susanne

Susanna, Susanne, Susann og liknande namn er kvinnenamn av hebraisk opphav. Dei kjem alle frå namnet שׁוֹשַׁנָּה [šōšannā], som tyder ‘lilje’. Namnet blei til Sousanna på gresk, Susanne og Suzanne på fransk og Susan på engelsk. Det har òg ei rekkje kortformer.

Namnet er best kjend frå Daniels bok, der det er namnet til ei vakker kvinne som badar og blir sett av to eldre menn. Når ho nektar å ligga med dei skulder dei henne for å ha drive hor med ein ung mann. Vitnesbyrdet deira blir gjennomskua fordi dei to nemner to svært ulike tre dette skal ha skjedd under når dei blir avhøyrt i einerom. Soga har inspirert mange kunstverk.

Det finst òg ei Susanna i Lukasevangeliet (8:1-3). Ho var ei av kvinnene som følgde Jesus.

I den katolske kyrkja er Susanna namnet til ein martyr og helgen frå Dalmatia. Ho skal ha vore dottera til den heilage Gabinus av Roma og niesa til paven Caius. Ho blei halshogd i Roma i 295 under keisar Diokletian.

Variantar

kortformer i mange land: Susi, Suse, Sanne, Sanna, Susa, Susu
engelsk: Susan, Susann, Sue, Suzie
fransk: Susanne, Susette, Suzette
finsk: Sanna, Sanni, Susanna
georgisk: Schuschanik
italiensk: Susanna
kviterussisk: Sjuzanna, Susanna, Zulisja
litauisk: Zuzana, Zūzana, Zūzane, Zuze, Zūze, Zūne
persisk: Susæn, Suzan
spansk: Susana
svensk Susen, Sanna
slavisk: Susanka
ungarsk: Zsuzsa, Zsuzsánna, Zsuzska

Bruk

Susanna av Bayern (1502–1543), dotter av hertug Albrecht IV av Bayern.

Namnet har vore brukt i Skandinavia sidan 1200-talet. På 1900-talet blei den franske forma av namnet, Susanne, vanlegare enn den greske forma. Det er i dag rundt 4 000 som heiter Susanne i Noreg, mot rundt 750 med namnet Susann, 650 Susan og 250 Susanna (2005). I Sverige gjekk Susanne gjennom ei popularitetsbølge på 1960- og 70-talet og var ei stund det femte vanlegaste jentenamnet. Ved inngangen til 2005 hadde 50 985 svenskar førenamnet Susanne, medan 12 917 heitte Susanna.

Susan var blant dei ti mest gjevne namna i USA frå 1940 til 1970. Det var det 8. mest brukte kvinnenamnet i 1990, men er i dag mykje mindre brukt.

Namnedag

Susanne har norsk namnedag den 16. juli. Susanna har svensk namnedag den 11. august medan Susanne ikkje lenger har namnedag. Også i andre land er det vanleg å feira namnedagen den 11. august, fordi den katolske kyrkja feira den heilage Susanna denne dagen. Ho blei teken ut av den katolske helgenkalenderen i 1969.

Annan bruk

Susanna er eit oratorium i tre delar av Händel.

Susanne er òg namnet på ein dansk film frå 1950 og ein svensk film frå 1960.

«Oh! Susanna» er ein kjend amerikansk song frå 1840-talet. I nyare tid har Leonard Cohen brukt namnet i songen «Suzanne» og Espen Lind i «When Susannah cries (she cries a rainstorm)».

Kjende namneberarar

Súsanna Helena Patursson.

Susanna Agnelli, italiensk politikar
Susan B. Anthony, amerikansk feminist
Susanne Bier, dansk regissør
Suzanne Brøgger, dansk forfattar
Susanna Clarke, britisk forfattar
Susan Faludi, amerikansk feministisk forfattar
Súsanna Helena Patursson, færøysk feministisk forfattar
Susan Sarandon, amerikansk skodespelar
Susan Sontag, amerikansk forfattar
Susanne Sundfør, norsk musikar
Suzanne Vega, amerikansk musikar

Bakgrunnsstoff

Søk etter norsk namnestatistikk for Susanne hjå Statistisk Sentralbyrå
Internasjonal namnestatistikk for Susan på behindthename.com