Bering

Bering er det å halda noko oppe og ta det med seg. Menneske kan bera noko i handa, på armen, skuldera, hovudet, ryggen eller på andre måtar ved hjelp av utstyr eller ulike innretningar, eller dei kan få dyr til å bera, som ridedyr eller kløvdyr. Dyr kan også bera ting for seg sjølv, til dømes ved hjelp av munnen, klørne eller spesielt tilpassa kroppsdelar. I moderne tid er mykje bering erstatta av røyr, kranar, heisar, vogner, traller, fargreier og andre maskinar.

In Holland (ca. 1887-1890) av den amerikanske målaren Gari Melchers. To kvinner ber eit åk, ei ryggkorg og ei rive.

Blant levande vesen er det hovudsakleg berre menneske og maur som samarbeider om å bera. Det finst også spreidde døme blant sosiale edderkoppar, gjødselbiller og ungrotter.

Menneske som ber

Menneske over heile verda kan bera med seg næringsmiddel, utstyr, eigedelar og andre menneske, særleg mindre barn. Det finst ei rekkje ulike hjelpemiddel for å bera, som berenett, bøtte, veske, korg, krukke, meis, åk og ryggsekk. To eller fleire personar kan bera noko saman, til dømes ved hjelp av ein stokk, ei båre eller ein berestol.

Menneske kan bera tunge bører viss det felles tyngdepunktet til overkroppen og børa saman ligg over både rørsleaksa til ryggsøyla og underlivet. Dette gjer bering på hovudet til ein effektiv beremetode. Ved bering av ei tung bør på ryggen kan ein bøya seg framover for å flytta tyngdepunktet, men dette kan føra til skader. Utstyr som ryggsekkar og meisar kan hjelpa til med å fordela vekta på andre delar av kroppen, som hoftene.

Yrke som hovudsakleg har med bering å gjera er berar, sjauar og flyttemannskap.

Galleri

• 
  Indisk bondokvinne som ber eit barn i beresele og ei korg på hovudet.
• 
  Mann ber ei bør på 90 kg i åk frå ei svovelgruve ved Kawah-Ijen i Indonesia.
• 
  Mann ber drikkevarer med eit åk i Hangshan i Kina.
• 
  Kvinne som har flykta til Munigi i Kongo ber ei bør på ryggen med støtte frå panna.
• 
  Mann i Chitral i Pakistan ber ei bør på ryggen ved hjelp av eit nett.
• 
  Mann ber boksar ned ei trapp i Quebec i Canada.
• 
  To unge buddhistmunkar i Leh ber to bøtter på ein stokk mellom seg.
• 
  Japansk jente ber eit barn på ryggen og ei leike i handa ca. 1911
• 
  Ein eldre, ufør mann blir boren til stemmelokalet i Delhi på ei seng i 1952.

Bering som konkurranse

Styrketevlingar som styrkeløft eller vektløfting omfattar ofte løfting medan ein står på staden, men kan også innebera bering av tunge gjenstandar over avstand, som i strongmantevlingar og highland games. Elles blir bering brukt i meir lettsindige konkurransar, som potetløp og konebering.

Symbolikk

Bering kan vera ei symbolsk handling som er del av ritual, seremoniar og liknande. I samband med opptog, oppstillingar og mønstringar kan ein bera flagg, faner, symbolske gjenstandar eller våpen, gjerne på særskilde måtar. Ved seremoniar som bryllaup eller kroning kan ein til dømes bera ein dyrebar gjenstand, som ein ring eller ei krone, på ei pute for å visa han ekstra vyrdnad.

I religiøse opptog kan ein bera med seg helgen- eller gudsfigurar, gjerne opphøgd på ei spesiell bereinnretting. I kristne opptog kan ein bera ein kross som symbol på Kristus eller til minne om at Jesus sjølv bar krossen sin til krossfestinga. Sistnemnde hending er eit utbreidd motiv i kristen kunst.

Bering av spesielle gjenstandar kan også vera ein del av valfart, til dømes ved at ein ber med seg offer til ein heilagdom eller tek med seg noko, som heilag vatn frå ei elv, til heimstaden sin. Under den tamilske høgtida thaipusam ber ein ulike bører kalla kavadi til minne om at Idumban bar med seg to åsar i eit åk. Gudommelege eller mytologiske figurar kan i ulike forteljingar eller framstillingar bera med seg ting som kan demonstrera ei særskild kraft eller styrke. Innan hinduismen finst det til dømes ei soge om at Hanuman bar med seg eit fjell det vaks særskilde urter på i staden for å plukka urtene, medan Bibelen har ei soge om at Samson bar med seg byportane til Gaza til ein ås ved Hebron.

Galleri

• 
  Kristus ber krossen. Måleri av Hieronymus Bosch.
• 
  Israelittar ber med seg druer frå Kanaan. Motiv frå Fjerde Mosebok.
• 
  Ein elefant ber relikviane etter Buddha. Leivningane etter Buddha skal ha blitt sende ut til ulike herskarar under stor seremoni som omfatta at elefantar bar dei.
• 
  Mann under påsketida i New Mexico i 1920 som ber ein kross til minne om krossfestinga av Jesus.
• 
  Deltakarar under hinduhøgtida dol yatra ber ein palankin.
• 
  Sikh-pilgrimar ber mursteinar til Det gylne tempelet.
• 
  Gut ber ringar på ei pute i samband med eit bryllaup.
• 
  Kinesisk gravferdsprosesjon der ein ber flagg, ein palankin og eit bilde av den avdøde.

Berande dyr

Dyr kan bera med seg saker i munnen, til dømes mat til ein lager- eller etestad, materiale til å byggja bustader med, eller avkom for å passa på det. Nokre fiskar driv med munnruging, det vil seia at dei held yngelen trygg inne i munnen sin. Pungdyr har eigne pungar dei kan bera med seg ungane sine i. Nokre insekt, som bier, maur og termittar, kan bera daude individ til ein oppsamlingsstad.

Maur kan bera ulike typar last med kjevene. Nokre av dei kan bera tunge bører som er opptil 50 gonger så tunge som deira eiga vekt. Maur kan også samarbeida om å bera større ting saman. Dei kommuniserer med andre maur og finn vegen ved hjelp av feromonar. I tillegg kan ein hjelpemaur leia ei gruppe som ber ei større bør i rett retning.

Når menneske bruker dyr til å bera ting fester dei ofte børa på ryggen og/eller sidene til dyret. Nokre dyr kan trenast til å løfta ting sjølv for å bera dei, som elefantar med snabelen og tenestehundar med munnen.

Galleri

• 
  Maur som ber eit blad.
• 
  Vevarmaur samarbeider om å bera eit lite insekt.
• 
  Stor lyngrovedderkopp ber med seg egg.
• 
  Edderkopp ber med seg barn på kroppen.
• 
  Krabbe ber med seg rogn.
• 
  Stork ber kvistar til reirbygging.
• 
  Hornfugl ber mat i nebbet.
• 
  Elefant ber greiner i Guruvayoor i Kerala.
• 
  Esel som ber pinnar i Afghanistan.
• 
  Esel med tradisjonelle rahal-korger.
• 
  Kamel med korger på sidene.