Kari Midtigard på Tinn

Kari Midtigard på Tinn er ein springar som er mykje nytta i Telemark, men og på Voss, der springaren heiter Fossmarken. Øistein Håkanes skreiv til Arne Bjørndal i 1945: ..."En luråsslått. Kari Midtigarden på Tinn er sikkert kommet fra Voss". Det finst og ein gamal form av slåtten i Flesberg som er kalla Løytnantdrengen.

Kari Midtigard på Tinn heitte opphavleg Kari Varen og var frå Åmotsdal. Ho var i teneste på Midtigard Lurås på Tinn då ho fekk ein unge med Halvor Lurås, onkelen til spelemannen Knut Lurås. Denne ungen vart seinare rosemålaren Knut Hovde frå Tuddal, som vart tippoldefar til spelemennene Hauk Buen og Knut Buen.

Kvedaren Talleiv Røysland har den mest utbygde stev-forma til slåtten, der dei første linene går slik:

Kjenner du Kari Midtigard på Tinn

Ho slepper ikkje gutane inn...

Visa slik ho er attgjeven hjå Talleiv fortel korleis Kari vart vunnen.

Variantgruppa

Slåtten har katalognummer 489 i Hardingfeleverket band VI. Slåtten har seks variantar i gruppa.

• a: Fossmarken, etter Ola Mosafinn, Voss [1]. Nedskrift Arne Bjørndal (Bjørndal nye slåttar nr 12). Slåtten heiter etter spelemannen Johannes Fossmark frå Bruvik i Hordaland. Mosafinn spela og inn slåtten på Pathefon i 1910.

• b: Springar etter Ola Dekko/Vårdagen, etter Sevat Sataøen, Ål [2]. Nedskrift Eivind Groven 1962 (G 1415, NRK magn. 1873). Namnet Vårdagen skriv seg frå spelemannen Hans Holto i Ål.

• c: Kari Midtigard på Tinn, etter Hans Smeland, Seljord [3]. Nedskrift Arne Bjørndal 1911 (B 151).

• d: Kari Midtigard på Tinn, etter Johannes Dale, Tinn [4]. Nedskrift Eivind Groven 1961 (G 1325, NRK magn. 2073). Slåtten er og notert av Gregar Nordbø og hjå Ludvig Mathias Lindeman (Norske fjeldmelodier).

• e: Margit Mjaugedal, etter Eivind Groven, Lårdal [5]. Nedskrift 1960 (G 1225). Slåtten har sams stev som dei andre formene, men namnet er bytta ut.

• f: Løytantdrengen, etter Hellik Ranvik, Flesberg [6]. Nedskrift Sven Nyhus 1977.