Santamartasabelveng
Santamartasabelveng (Campylopterus phainopeplus) er ein stor kolibri som er endemisk for Sierra Nevada de Santa Marta i det søramerikanske landet Colombia. Arten er klassifisert som kritisk truga (CR) av Verdas naturvernunion, IUCN.
| Santamartasabelveng | |
 Santamartasabelvenghann | |
| Utbreiing og status | |
Status i verda:  Kritisk truga Utbreiinga av Santamartasabelveng | |
| Systematikk | |
| Rike: | Dyr Animalia |
| Rekkje: | Ryggstrengdyr Chordata |
| Underrekkje: | Virveldyr Vertebrata |
| Klasse: | Fuglar Aves |
| Orden: | Seglarfuglar Apodiformes |
| Familie: | Kolibriar Trochilidae |
| Underfamilie: | Trochilinae |
| Stamme: | Trochilini |
| Slekt: | Campylopterus |
| Art: | Santamartasabelveng C. phainopeplus |
| Vitskapleg namn | |
| Campylopterus phainopeplus | |
Skildring
endreSantamartasabelvengen får ei lengd på ca. 13 centimeter. Det kraftige 25 millimeter lange nebbet er svakt nedbøygd. Hannen er overvegande grøn: krona er grøn og han er glitrande grøn frå nakken og bakover oversida. Halsen og brystet er glinsande blå. Den rektangulærforma halen er stålblå til svart. Nebbet er svart. Hofuglen skil seg frå hannen med litt mattare kinn, og undersida er gråkvit med grøne flekker på sidene. Den grøne halen har nokre grå flekker.
Kolibrien lever i fuktige skogbryn og i skuggefulle plantasjar. Blant dei plantasjane han føretrekker er bananplantasjar på dei sørlege skråningane til Sierra Nevada de Santa Marta i San Sebastián de Buenavista. Han lever i høgder mellom 1200 og 4800 meter over havet, og han gjer vertikale trekk slik at i den tørre årstida frå februar til mai helst finst på 1200-1800 meter. I den fuktigare sesongen frå juni til oktober kan du sjå han i dei største høgdene med det typiske páramo-økosystemet opp til snøgrensa. På dei nordlege skråningane finst han berre på den austlege enden av det øvre løpet av Rio Macotama.
Fuglen beitar vanlegvis åleine i låge til middels høge nivå av vekstane han et av. Når han et nektar skjer det i skuggefulle og delvis opne område. Når han syng, sit han som regel på høge, synlege greiner. Han hekkar i perioden frå april til juni.
Ettersom berre 15 % av den opphavlege vegetasjonen i Sierra Nevada de Santa Marta står att, er det naturlege habitatet til arten trudd å vere truga. Det største trugsmålet kjem frå ulovleg dyrking av marihuana og kokain. Men tidlegare har òg dyrking av kaffi og bananar sidan 1950 hatt negative effektar på økosystemet. Hekkeområda til denne fuglen er i mykje mindre gjestfrie område og er soleis mindre utsette for trugsmål. Populasjonen er estimert til under 10 000 individ.[1]
Det første kjente fotografi av eit levande eksemplar av arten er frå den 24. mars 2010.[2]
Kjelder
endre- Denne artikkelen bygger på «Santa-Marta-Degenflügel» frå Wikipedia på tysk, den 4. juli 2015.
- Züchner, T., de Juana, E. & Boesman, P. (1999). Santa Marta Sabrewing (Campylopterus phainopeplus) In: del Hoyo, J., Elliott, A., Sargatal, J., Christie, D.A. & de Juana, E. (eds.) (2014). Handbook of the Birds of the World Alive. Lynx Edicions, Barcelona. Henta den 4. juli 2015
- BirdLife International (2015) Species factsheet: Campylopterus phainopeplus. Henta frå http://www.birdlife.org den 5. august 2023
- Referansar
- ↑ BirdLife International (2015)
- ↑ ProAves First ever photo of Endangered Santa Marta Sabrewing (eng.) Henta 4. juli 2015