Tessa Sanderson
Tessa Sanderson, fullt namn Theresa Ione Sanderson, (fødd 14. mars 1956) er ein britisk tidlegare spydkastar. Ho vart i 1984 olympisk meister i spydkasting og vann EM-sølv i same øvinga i 1978.
| Tessa Sanderson | |
 | |
| Statsborgarskap | Storbritannia |
| Fødd | 14. mars 1956 (68 år) Saint Elizabeth Parish |
| Yrke | spydkastar |
| Språk | engelsk |
| Høgd | 168 centimeter |
| Tessa Sanderson på Commons | |
Aktiv endre
Sanderson er fødd i St. Elizabeth på Jamaica. Ho emigrerte til Wolverhampton i Storbritannia. I august 1978 var Sanderson suverent best i spydtevlinga under samveldeleikane i Edmonton med eit kast på 61,34 m. Ein månad seinare auka ho med ein meter og kneip sølvmedaljen framom to austtyske utøvarar i ei elles jamn EM-tevling i Praha, men hamna bortimot sju meter bak den suverene vinnaren, Ruth Fuchs frå Aust-Tyskland.
Den 26. mars 1983 gjorde Sanderson sitt livs lengste spydkast i Edinburgh, der spydet landa etter 73,58 meter. I august same året enda ho på fjerdeplassen i friidretts-VM med eit kast på 64,76 m, knapt meteren bak bronsevinnar Anna Verouli frå Hellas. Under dei olympiske leikane i Los Angeles i 1984 smelte Sanderson til med med 69,56 m i fyrste omgang og vann med det gullmedaljen framom favorittane, finske Tiina Lillak og hennar eiga landskvinne, Fatima Whitbread.
Ved samveldeleikane 1986 nådde spydet til Sanderson 69,80 m og ho sigra dermed over verdsrekordhaldar Fatima Whitbread med over ein meter. Ved verdsmeisterskapen i Roma i 1987 var derimot Whitbread suveren og vann gull med eit kjempekast på 76,64 m, medan Sanderson måtte nøye seg med fjerdeplassen, nett som i førre VM og som den gong då ein lang meter bak bronsemedaljøren.
Den 1. februar 1990 vart Sanderson i Auckland samveldemeister for tredje gong, med eit bestekast på 65,72 m slo ho nummer to med 4,5 meter. Under Sommar-OL 1992 vart ho med 63,58 m nummer fire og langt unna bronseplassen, men fire centimeter framom ein av favorittane, norske Trine Hattestad.
Sanderson la opp i 1997, 41 år gammal.
Medaljar og plasseringar i internasjonale meisterskap endre
- OL 1976 i Montreal: Nr 10 – 57,00 m
- EM 1978 i Praha: Sølvmedalje – 62,40 m, framom Ute Hommola (62,32 m)
- OL 1980 i Moskva: Utslått i kvalifiseringa (48,76 m =nr 19)
- VM 1983 i Helsinki: Nr 4 – 64,76 m
- OL 1984 i Los Angeles: Gullmedalje – 69,56 m, framom Tiina Lillak (69,00 m)
- VM 1987 i Roma: Nr 4 – 67,54 m
- OL 1988 i Seoul: Utslått i kvalifiseringa (56,70 m =nr 21)
- EM 1990 i Split: Nr 12 – 57,56 m
- OL 1992 i Barcelona: Nr 4 – 63,58 m
- OL 1996 i Atlanta: Utslått i kvalifiseringa (58,86 m =nr 14)
- VM 1997 i Aten: Utslått i kvalifiseringa (57,84 m =nr 18)
Kjelder endre
- Denne artikkelen bygger på «Tessa Sanderson» frå Wikipedia på engelsk, den 26. juli 2017.