Torgeir Brandtzæg
Torgeir Torbjørn Brandtzæg (fødd 6. oktober 1941) i Ogndal er ein norsk, tidlegare skihoppar som under vinter-OL 1964 i Innsbruck vann bronsemedaljen både i normalbakke- og storbakkerennet. Brandtzæg tevla for Ogndal IL, og gjekk under tilnamnet «Friskusen frå Ogndalen».
| Torgeir Brandtzæg | |
|
| |
| Statsborgarskap | Noreg |
| Fødd | 6. oktober 1941 (83 år) Steinkjer kommune |
| Idrett | skihopping |
| Tok del i | Skihopping under Vinter-OL 1964 – Normalbakke, Skihopping under Vinter-OL 1964 – Stor bakke |
Brandtzæg slo seg inni i den internasjonale hoppeliten under den tysk-austerrikske hoppveka 1962/63. Samanlagt vart han nummer 5, etter å ha vorte nummer 2 bak Torbjørn Yggeseth i avslutningsrennet i Bischofshofen.
Både i 1963 og 1964 hadde Brandtzæg einast ein jambyrdig konkurrent i NM-rennet, Yggeseth i 1963 og Toralf Engan i 1964. Brandtzæg vart noregsmeister begge åra. I 1965, fyrste hoppsesongen det vart avvikla renn i både normal og stor bakke, var stoda sameleis i storbakken, då var det Bjørn Wirkola som med knapp margin vart vist til sølvplassen. I normalbakken Midtubakken derimot, vart Wirkola ein ganske klar vinnar, føre Brandtzæg.
Brandtzæg vann ein suveren siger i Svenska skidspelen i 1964. I hopprennet i Lahti same sesongen, der han vart nummer 2, hoppa han nesten jamnt med Veikko Kankkonen.
Brandtzæg gjekk til topps i den tysk-austerrikske hoppveka 1964/65. Han sigra i tre av renna, og vann med klar margin til toaren Wirkola. Brandtzæg vart sterkt skadd under eit renn i Pitkävuori i 1965, og la deretter hoppskia på hylla.
Besteplasseringar i internasjonale meisterskap og renn
endre- 1962: Nr 7 i Holmenkollen
- 1963: Nr 2 i Bischofshofen, nr 3 i Svenska skidspelen i Falun
- 1964: Siger i Svenska skidspelen i Kiruna, nr 2 i Lahti
- 1965: Vinnar av den tysk-austerrikske hoppveka. Han sigra i enkeltrenn i Oberstdorf, Innsbruck og i Lahti
Medaljar og besteplasseringar i noregsmeisterskap
endre- Ski-NM 1963: Gullmedalje
- Ski-NM 1964: Gullmedalje på Voss
- Ski-NM 1965: Gullmedalje i storbakken i Bærum, sølvmedalje i normalbakken i Oslo
Bibliografi
endre- Nils Werenskiold og Torgeir Brandtzæg: Friskus'n fra Ogndalen. Pax forlag 1967
Kjelder
endre- Sportsboken, aktuelle årgangar
Bakgrunnsstoff
endre- (en) Torgeir Brandtzæg – Profil og resultatoversikt hos FIS