a-ha
a-ha er ei norsk popgruppe som vart danna i 1982 med medlemmene Magne Furuholmen (keyboard, gitar, song), Pål Waaktaar (keyboard, gitar, trommer, song) og Morten Harket (song).
Historikk
endreI 1985 slo dei igjennom både i Europa og i USA med Take On Me, blant anna på grunn av ein delvis animert musikkvideo. Under Spellemannprisen 1985 vann gruppa klassen pop for cd-en Hunting High and Low, og vart i tillegg kåra til årets spellemann. Neste år, under Spellemannprisen 1986 vann dei igjen klassen pop for cden Scoundrel Days, fekk prisen for årets musikkvideo for songen Hunting High and Low og fekk heidersprisen frå juryen.
Blant dei seinare hitane til gruppa er The Sun Always Shines on TV, Manhattan Skyline, The Living Daylights (frå James Bond-filmen Living Daylights) og Stay on These Roads.
I 1990 hadde dei ein hit med ei nyinnspeling av Everly Brothers-låten Crying in the Rain frå 1961.
Under «Rock in Rio»-festivalen i 1991 samla a-ha 194 000 tilskodarar på Maracanã-stadionen i Rio de Janeiro. Dette er verdsrekord for tal betalande på ein konsert. Til samanlikning samla George Michael og Guns 'n Roses 60 000 tilskodarar kvar under den same festivalen.
På grunn av sterke personlege motsetnader i bandet, vart a-ha oppløyst i 1993. Dei kom likevel saman i 1994 for å opptre under OL på Lillehammer, blant anna med ein melodi dei hadde skrive for Paralympics-leikane, Shapes That Go Together. Dei kom òg saman for å spela under konserten i samband med utdelinga av Nobels fredspris i 1998. Etter dette gjekk gruppa i studio og spelte inn albumet Minor Earth Major Sky i 2000, som resulterte i ein ny turné. Dei vann Spellemannprisen 2000 for musikkvideoen til songen Velvet, regissert av Harald Zwart. Denne musikkvideoen vart kontroversiell fordi han fann stad i eit likhus og skildra nekrofili. Under same prisutdeling vart A-ha også tildelt heidersprisen til juryen.
I 2002 gav dei ut albumet Lifelines, og selde framleis godt, spesielt i Sentral-Europa og Skandinavia. I 2004 signerte a-ha ei kontrakt med Universal Music som inneber at bandet forpliktar seg til å produsere tre nye album.
Under Spellemannprisen 2008 vann A-ha på nytt ein spellemann. Prisen vart kalla Tidenes VG-listelåt og gruppa vann han for Take On Me. Under Spellemannprisen 2010 vart dei tildelt heidersprisen til Spellemannkomitéen.
Utmerkingar
endre- Spellemannprisen 1985 i klassen pop for cd-en Hunting High and Low. Gruppa vart i tillegg kåra til årets spellemann.
- Spellemannprisen 1986 i klassen pop for cden Scoundrel Days, i klassen årets musikkvideo for songen Hunting High and Low og heidersprisen frå juryen.
- Peer Gynt-prisen i 1987.
- Spellemannprisen 2000 for musikkvideoen til songen Velvet.
- Gammleng-prisen 2008 i klassen pop.
- Spellemannprisen 2008 for Tidenes VG-listelåt, Take On Me.
- Tildelt heidersprisen til spellemannkomitéen under Spellemannprisen 2010.
Diskografi
endre| År | Tittel | Føretak |
|---|---|---|
| 1985 | Hunting High and Low | Warner Bros. Records |
| 1986 | Scoundrel Days | |
| 1988 | Stay on These Roads | |
| 1990 | East of the Sun, West of the Moon | |
| 1993 | Memorial Beach | |
| 2000 | Minor Earth Major Sky | |
| 2002 | Lifelines | |
| 2005 | Analogue | Universal Music Group |
| 2009 | Foot of the Mountain | |
| 2015 | Cast in Steel | |
| 2022 | True North | Sony Music/RCA Records |