Fotballkampen Noreg-England i 1993

Fotballkampen Noreg – England i 1993 var ein kvalifiseringskamp i UEFA gruppe 2 til VM i fotball 1994. Kampen vart avvikla onsdag 2. juni på Ullevål stadion i Oslo framfor 22 256 tilskodarar.

Kampen

Noregs lag bestod av Erik Thorstvedt, Gunnar Halle, Tore Pedersen, Rune Bratseth (kaptein), Stig Inge Bjørnebye, Erik Mykland, Kjetil Rekdal, Øyvind Leonhardsen, Jostein Flo, Jan Åge Fjørtoft og Lars Bohinen. Gøran Sørloth tok plassen til Fjørtoft i det 57. minutt, medan Roger Nilsen spelte siste 10 minutta i staden for Bratseth.

England stilte med: Chris Woods, Lee Dixon, Gary Pallister, Tony Adams, Des Walker, Carlton Palmer, David Platt (kaptein), Paul Gascoigne, Les Ferdinand, Teddy Sheringham, Lee Sharpe. I pausa måtte Sheringham vike plass for Ian Wright. Walker vart tatt av bana i det 63. minutt, inn kom Nigel Clough.

Øyvind Leonhardsen sende Noreg i føringa i det 43. minutt. Frå 5-6 meters hald fekk han tuppa ballen høgt i målet etter ein stikkar frå Fjørtoft. Berre tre minutt ut i andre omgang la Lars Bohinen på til 2–0 då han frå skrått hald lyfta ballen over England si målvakt. Resultat var med å sikre Noreg plass i VM-turneringa året etter, og England kom ikkje med til meisterskapen.

Sándor Puhl frå Ungarn dømde kampen. Vel eitt år seinare dømde han VM-finalen mellom Brasil og Italia.

Egil Olsen var norsk landslagssjef.

Kjelder

• eu-football
• Tidens Krav 3. juni 1993