Fred Børre Lundberg

Fred Børre Lundberg (fødd 25. desember 1969) er ein norsk tidlegare kombinertrennar. Lundberg dominerte kombinertsporten i fyrste halvpart av 1990-åra. Han vart verdsmeister i 1991 og 1995 og vann olympisk gull på Lillehammer i 1994. Lundberg var dessutan med på å vinne tre gullmedaljar og fire sølvmedaljar for norske lag i verdsmeisterskapar og olympiske leikar i tida frå 1991 til 1999. Han vann verdscupen i nordisk kombinert i 1991, og var mellom dei tre beste i verda dei neste tre sesongane. Lundberg vann fem NM-gull, det siste i halvprogrammet, og fekk to bronsemedaljar i NM, den eine av desse i skihopping.

Fred Børre Lundberg
Statsborgarskap	Noreg
Fødd	25. desember 1969 (54 år) Hammerfest kommune
Idrett	kombinert
Tok del i	Nordic combined at the 1994 Winter Olympics – individual, Nordic combined at the 1992 Winter Olympics – team, Nordic combined at the 1998 Winter Olympics – team
Utmerkingar	Holmenkollmedaljen, Troms fylkeskommunes kulturpris

Lundberg var fødd i Hammerfest og oppvaksen i Bardu.

Karriere

Lundberg vart i januar 1990 nummer to i eit verdscuprenn i kombinert i Murau, berre slått av Klaus Sulzenbacher frå Austerrike. Vel tre veker seinare noterte Lundberg seg for sin fyrste siger i verdscupen då han gjekk til topps i ei tevling ved Leningrad, framom landsmannen Knut Tore Apeland. Fram til sin siste siger i verdscupen, i januar 1996, vann Lundberg åtte nye verdscuprenn. Han oppnådde i alt 29 pallplasseringar i verdscupen, den siste i Falun i mars 1998. Han vann verdscupen i kombinert i 1991, kom på tredjeplass i 1992 og 1994, og på andreplass i 1993.

Lundberg vann sin fyrste VM-tittel i kombinert i Val di Fiemme i 1991. Året etter vart han nummer fire i den olympiske tevlinga i Albertville, der han vann seg eit OL-sølv i lagtevlinga saman med Knut Tore Apeland og Trond Einar Elden. Året etter vart det ein ny sølvmedalje på dei same tre karane i verdsmeisterskapen i Falun, begge gongane gjekk gullet til Japan. Lundberg vart ikkje utteken til den individuelle tevlinga i VM.

På Lillehammer i 1994 gjekk Lundberg i mål som olympisk meister i den individuelle øvinga, framom Takanori Kōno frå Japan og bronsemannen Bjarte Engen Vik. I Ski-VM 1995 i Thunder Bay sigra Lundberg i den individuelle øvinga og fekk sølv i lagtevlinga. I lagtevlinga var det no snakk om eit firemannslag, og dei tre kombinertrennarane som tidlegare hadde vunne sølvmedaljar i lag, hadde fått med seg fyrstetappeløparen Halldor Skard. To år seinare vart dei same fire; Skard, Vik, Apeland og Lundberg, verdsmeistrar for lag under ski-VM 1997 i Trondheim.

Året etter, i 1998, vart Lundberg og Noreg olympiske meistrar for lag, etter å ha vist Finland til sølvplassen. Lundberg gjekk sisteetappen, føre han gjekk Skard, Kenneth Braaten og Vik.

Medaljar og besteplasseringar i internasjonale meisterskap

• Ski-VM 1991 i Val di Fiemme: Gullmedalje
• Vinter-OL 1992 i Albertville: Nr 4, sølvmedalje i lag
• Ski-VM 1993 i Falun: Sølvmedalje i lag
• Vinter-OL 1994 på Lillehammer: Gullmedalje, sølvmedalje i lag
• Ski-VM 1995 i Thunder Bay: Gullmedalje, sølvmedalje i lag
• Ski-VM 1997 i Trondheim: Gullmedalje i lag
• Vinter-OL 1998 i Nagano: Gullmedalje i lag, nr 16 individuelt
• Ski-VM 1999 i Ramsau: Sølvmedalje lag, nr 12 individuelt

Medaljar og besteplasseringar i noregsmeisterskap

• Ski-NM 1990: Nr 4 på Gjøvik
• Ski-NM 1991: Gullmedalje i Misvær
• Ski-NM 1992: Nr 5 i Trondheim
• Ski-NM 1993: Gullmedalje i kombinert og fjerdeplass i normalbakken i skihopping, begge på Lillehammer
• Ski-NM 1994: Gullmedalje i kombinert og bronsemedalje i normalbakken i skihopping, begge i Vegårshei
• Ski-NM 1995: Gullmedalje i kombinert i Oslo
• Ski-NM 1996: Nr 5 i Stryn
• Ski-NM 1997: Bronsemedalje i Mo i Rana
• Ski-NM 1999: Nr 4 på Raufoss
• Ski-NM 2000: Gullmedalje i kombinert (halvprogram) på Vang

Verdscupsigrar

#	Dato	Land	Stad
1	10. februar 1990	Sovjetunionen	Leningrad
2	15. desember 1990	Noreg	Trondheim
3	5. januar 1991	Tyskland	Schonach
4	8. januar 1993	Tyskland	Schonach
5	4. mars 1994	Finland	Vuokatti
6	12. mars 1994	Japan	Sapporo
7	10. desember 1994	Slovakia	Štrbské Pleso
8	7. januar 1995	Tyskland	Schonach
9	6. januar 1996	Tyskland	Schonach

I 1998 vart Lundberg tildelt Holmenkollmedaljen, samstundes med Larisa Lazutina, Harri Kirvesniemi og Aleksej Prokurorov.

Lundberg la opp i 2000.

Kjelder

• Sportsboken, aktuelle årgangsr

Bakgrunnsstoff

• Fred Børre Lundberg i fis-ski.com
• Fred Børre Lundberg i olympedia.org