Per Bergerud
Per Bergerud (fødd 28. juni 1956) er ein tidlegare norsk skihoppar frå Flesberg i Buskerud, og noverande næringsdrivar. Han vart verdsmeister i 1985 då han vann rennet i storbakken i Innsbruck. I 1982 var han saman med Johan Sætre, Ole Bremseth og Olav Hansson med på laget som i Oslo vann den fyrste verdsmeisterskapen i skihopping for lag. Mellom 1978 og 1985 vart han noregsmeister åtte gonger. Han var medlem av Svene IL.
| Per Bergerud | |
| Statsborgarskap | Noreg |
| Fødd | 28. juni 1956 (67 år) Flesberg kommune |
| Idrett | skihopping |
| Tok del i | |
| Utmerkingar | |
Karriere endre
Bergerud debuterte internasjonalt i den tysk-austerrikske hoppveka i 1974. Fyrst i 1977-sesongen slo han gjennom, kom då på medaljeplass i begge NM-renna og var som best på ein sjuandeplass i verdscupen. Sin fyrste siger i store, internasjonale tevlingar kom i 1978 i Bergiselbakken i Innsbruck, under den tysk-austerrikske hoppveka. Same sesongen vart han norsk dobbeltmeister. Dobbel noregsmeister vart han også i 1983. Gjennom åra vann Bergerud åtte NM-gull, to sølvmedaljar og to bronsemedaljar. Siste NM-gullet kom i 1985. I alt mottok han fem kongepokalar. I 1979 sigra han i Holmenkollen etter ein spennande duell med Johan Sætre.
Verdscupen i skihopping vart arrangert frå sesongen 1979/80. Bergerud vann dei neste sesongane i alt fire verdscuprenn. Det fyrste var eit skiflygingsrenn i Vikersund i 1980, sidan vann han to renn i Engelberg, 1981 og 1983. I mellom sigrane i Engelberg, vann han i 1982 sin andre siger i den tysk-austerrikske hoppveka, og atter i Innsbruck. Totalt vart han då nummer tre i hoppveka, bak den klare vinnaren Manfred Deckert og Roger Ruud. Den beste plasseringa hans samanlagd i verdscupen var femteplassen i 1983-sesongen.
Bergerud hamna eit godt stykke ned på resultatlistene i dei fleste internasjonale meisteskapane. I ski-VM 1978 i Lahti vart han nummer 11 i normalbakken som best, medan han under vinter-OL 1980 Lake Placid vart nummer 16 og 18 i dei to renna. Under ski-VM 1982 i Oslo var han med på gullaget i lagtevlinga, men bokførte 11. plassen i storbakkerennet som sin beste individuelle prestasjon.
Høgdepunktet for skihopparen Bergerud kom under Ski-VM 1985 i Seefeld, der han gjekk til topps i storbakken, Bergiselbakken i Innsbruck, og tok bronsemedaljen i normalbakken i sjølve Seefeld. I ei jamn tevling i Bergiselbakken, der Bergerud leia etter fyrste omgang, vann han føre finnane Jari Puikkonen og Matti Nykänen.
Besteplasseringar i internasjonale meisterskap og renn endre
- 1975: Nr 15 i Bischofshofen
- 1976: Nr 12 i Holmenkollen
- 1977: Nr 7 i Bischofshofen
- 1978: Siger i Innsbruck
- 1979: Siger i Holmenkollen
- 1980: Siger i Vikersund (skiflyging)
- 1981: Siger i Engelberg, ein andreplass (Garmisch-Partenkirchen) og to tredjeplassar (Bischofshofen og Harrachov)
- 1982: Siger i Innsbruck, to andreplassar (Sapporo og Planica)
- 1983: Siger i Engelberg, andreplass i St. Moritz og tredjeplass i Cortina d'Ampezzo
- 1984: Andreplass i Bischofshofen og tredjeplass i Liberec
- 1985: Verdsmeister i storbakken i Innsbruck, bronsemedalje i normalbakken i Seefeld. To tredjeplassar i verdscupen
Medaljar og besteplasseringar i noregsmeisterskap endre
- Ski-NM 1974: Nr 7 både i normalbakken og storbakken, i høvesvis Trondheim og Meldal
- Ski-NM 1975: Nr 6 i normalbakken i Rælingen
- Ski-NM 1976: Nr 4 i storbakken på Rena
- Ski-NM 1977: Sølvmedalje i normalbakke på Vang, bronsemedalje i storbakken på Odnes
- Ski-NM 1978: Gullmedalje både i normalbakke på Konnerud og i storbakken på Lillehammer
- Ski-NM 1979: Gullmedalje i storbakken i Bærum, sølvmedalje i normalbakken i Sprova
- Ski-NM 1980: Bronsemedalje i normalbakken i Asker
- Ski-NM 1981: Nr 4 i normalbakken i Rælingen
- Ski-NM 1982: Nr 6 både i normalbakken på Raufoss og i storbakken på Rena
- Ski-NM 1983: Noregsmeister både i normalbakken i Mo i Rana, og i storbakken på Lillehammer
- Ski-NM 1984: Noregsmeister i normalbakken på Kongsberg
- Ski-NM 1985: Noregsmeister både normalbakken i Bardu og i storbakken i Bærum
- Ski-NM 1986: Nr 8 i normalbakken på Vang
I 1985 vart Bergerud tildelt Holmenkollmedaljen
Kjelder endre
- Sportsboken, aktuelle årgangar
Bakgrunnsstoff endre
- Per Bergerud i fis-ski.com