Gamle Gulbrand

«Gamle Gulbrand», «Guro Lomodden» eller «Gamle Guro» er ein springar som er spela mange stader i landet. Slåtten er ein vandreslått på line med Tukthusen, dokumentert både i spel for hardingfele og vanleg fele. Melodien er skiftevis spela i dur eller moll.

Namnet «Gamle Guro» høyrer Numedal til, medan «Guro Lomodden» er den vanlege nemninga på slåtten i Telemark. Variantane frå Telemark er knytt til Lars Fykerud og Svein Løndal. Det er truleg Fykerud som har forma ut slåtten på Telemarksvis. Guro Lomodden var ei jente frå Seljord som var svært glad i å danse. Det finst og ein variant av Folkedalen som er kalla opp etter Guro. Mykje tyder på at slåtten har vore nytta i Seljord på eit tidleg stadie, men han er og gamal i Numedal, der han er knytt til Flesberg og tradisjonen etter Eivind Spellemann. Truleg er denne tradisjonslina den eldste.

I Hallingdal er slåtten best kjend som «Solmøy», medan namnet «Gamle Gulbrand» skriv seg frå stevet som ofte er knytt til slåtten.

Variantgruppa

I Hardingfeleverket har slåtten katalognummeret 509, med sju variantar.

• a: Guro Lomodden, etter Gunnulf Borgen, Bø i Telemark [1]. Nedskrift Truls Ørpen 1939(Ø 369). Borgen hadde slåtten etter Lars Fykerud, Sauherad.

• b: Gurosonen, etter Torkjell Haugerud, Bø i Telemark [2]. Nedskrift Eivind Groven 1961 etter opptak i NRK (G 1351, NRK magn. 596). Haugerudforma er og kalla Blomhaugjen. Gurosonen var eit oppnamn på Thorbjørn Fjeldstul frå Hjartdal, ein kjempekar det er fortald mange segner om.

• c: Igletveiten, etter Hans Smeland, Seljord [3]. Nedskrift Arne Bjørndal 1911 (B 147). Namnet er etter spelemannen Olav Igletveit frå Seljord.

• d: Ånestubben, etter Engebret Ødegård, Flå [4]. Nedskrift Truls Ørpen 1939 (Ø 229). Ødegård hadde slåtten frå far sin, spelemannen Knut Ødegård frå Flå. Slåttenamnet skriv seg frå ein spelemann som budde "attme Åne", (attmed åa). Forma har mange drag sams med variant f frå Flesberg.

• e: Solmøy, etter Sevat Sataøen, Ål [5]. Nedskrift Eivind Groven 1962 etter opptak i NRK (G 1403, NRK magn. 1874). Slåtten er etter spelemannen Tor Grimsgard frå Nes. Han gav og slåtten namn. Denne varianten er meir utbygd enn Ånestubben, og er meir nytta i dag.

• f: Gamle Guro, etter Andres Haugan, Lyngdal i Numedal [6]. Nedskrift Arne Bjørndal 1937 (B 97). Haugan hadde slåtten frå far sin, Ola Haugan, som hadde han frå Eivind Spellemann i Flesberg.

• g: Gamle Guro, etter Ole Berget, Flesberg [7]. Nedskrift Sven Nyhus 1976.

Variantar er og skrivne ned etter Steingrim Haukjem, Kristiane Lund og Eivind Groven. .