Vesle Kari Rud

«Vesle Kari Rud» eller «Gaute Navarsgard» er ein springar knytt til segna om Fanteladda. Kari Rud er eit anna namn på jenta i segna. Slåtten Vesle Kari Rud høyrer elles til ein annan slåttekrins, og kan handsamast for seg. Nokre av formene er skøytt saman med tak frå variantar av springaren «Asle Myro», til dømes «Helge Treisk» frå Jondalen.

Gaute Navarsgard var ein framifrå reinskyttar frå Møsstrond, som og hadde ord på seg for å drive med svartekunst. Stevet hans går slik:

Gaute Navarsgard

Det var snåle kar

Han skaut firogtjuge reinar på ein dag

Leiulv Kåveson

det var meir til mann

Han skaut alle dei som ikkje Gaute fann.

Segna fortel at Leiulv stakk av med ei jente Gaute skulle hatt.

Variantgruppa

Slåttekrinsen har fått katalognummer 505 i hardingfeleverket. Variantar av slåtten finst i Valdres, Krødsherad, Numedal, Hallingdal og Telemark. I Telemark har slåtten vore mest nytta i Bø og Hovin. springar nr 177, Kari Rud, er og knytt til gruppa:

• nr 177: Kari Rud, etter spelemannen Andreas Hauge, Nord-Aurdal. Nedskrift Arne Bjørndal 1947 (B 2209). Hauge hadde slåtten etter mora som tralla han, og ho hadde han frå ein husmann, Vestrebø i Nord-Aurdal. Denne forma går på nedstilt bass, motsett dei andre formene, som er på oppstilt.

nr. 505:

• a: Kjørstad-drepen, etter Olav Moe, Nord-Aurdal. Nedskrift Sven Nyhus 1976 etter opptak. Slåtten finst og etter Torleiv Bolstad og Herbrand Hagen. Namnet på slåtten er knytt til eit slagsmål under eit bryllaup på garden Øvre Dale i 1823.

• b: Vesle Kari Rud, etter Johan Kleven, Krødsherad. Nedskrift Truls Ørpen 1921 (Ø 52). Kleven hadde slåtten etter faren Gamle-Kleven. Denne forma er og nytta i Hallingdal.

• c: Gamle Kari Rud, etter Knut Sønåsen, Lyngdal i Numedal. Nedskrift Sven Nyhus 1976.

• d: Morslåtten, etter Gaute Buen, Jondalen i Buskerud. Nedskrift Arne Bjørndal 1932 (B 97). Buen lærde slåtten av Gullik K. Rua frå Jondalen, som døydde i 1900, vel 70 år gamal.

• e: Gaute Navarsgard, etter Halvor Borgen, Bø i Telemark. Nedskrift Eivind Groven 1922 (G 613). Groven skreiv ned slåtten etter ei grammofonplate.

• f: Tinnesand, etter Olav Flåto, Hovin. Nedskrift Eivind Groven 1960 etter opptak i NRK (G 1170, NRK magn. 1768). Tinnesand er eit eldre namn på Notodden.

• g: Gaute Navarsgard, etter Torkjell Haugerud, Bø i Telemark. Nedskrift Eivind Groven 1961 etter opptak (G 1364, NRK magn. 2577).

Supplementsform:

• nr 584: Kari Rud, etter Magne Myhren, Hol. Nedskrift Sven Nyhus 1978. Slåtten er etter Aslak Sandestølen og Kristian Øvrevollseie.