Queenstown på New Zealand

For andre tydingar av oppslagsordet, sjå Queenstown.

Queenstown er ein internasjonal ferieby i regionen Otago, sørvest på Sørøya på New Zealand. Byen ligg kring ei bukt med namnet Queenstown Bay ved Wakatipusjøen, ein lang, smal innsjø som er danna av isbrear, og byen har strålande utsyn mot dei nærliggjande fjella.

Queenstown
Horisonten til Queenstown
Styresmakter
Land Øy Region Distrikt	New Zealand Sørøya Otago Queenstown Lakes District
Geografi
Flatevidd - By	8704,97 km²
Innbyggjarar - By (2006) - Byområde	22956 10416
Koordinatar	45°01′52″S 168°39′45″E / 45.03111°S 168.66250°E / -45.03111; 168.66250
Diverse anna
Heimeside: https://www.queenstownnz.co.nz/
Plassering

William Gilbert Rees, saman med oppdagaren Nicholas von Tunzelman, var dei første europearane som slo seg ned i området. Rees var på leiting etter beitemarker, og etter eit første besøk kom han attende i 1860 og grunnla ein høglandsfarm der sentrum i den noverande byen ligg. Men føretaket til Rees fekk eit kort liv. I 1862 vart det funne gull i Arrowelva, eit kort stykke unna Queenstown.

Det vert fortalt ulike soger om korleis byen fekk namnet sitt. Den mest populære er at ein lokal gullgravar uttala at byen var som «skapt for Queen (dronning) Victoria». Queenstown er no kjend for den forretningsorienterte turismen sin, særleg opplevings- og skiturisme. Byen er populær både blant unge internasjonale tilreisande og for folk frå New Zealand.

Byen er det største senteret i Central Otago, og det tredje største i Otago. Nokre få administrative funksjonar, til dømes primærhelseteneste, er for tida tillagt naboregionen Southland. Ved folketeljinga i 2006 var folketalet i det urbane området i Queenstown (medrekna Frankton og Kelvin Heights) 10 416,^[1] ein oppgang på 22,1 % sidan 2001.

Nabobusetnadar og -distrikt omfattar Arrowtown, Wanaka, Alexandra og Cromwell. Dei næraste byane er Invercargill og Dunedin.

Queenstown-Lakes District har eit landareal på 8 704,97 km², utanom innsjøane Haweasjøen, Wakatipusjøen og Wanakasjøen. Det har eit estimert folketal på 28 700 (30. juni 2011).^[2]

Turisme

Queenstown og Remarkable Mountains

Plattform for strikkhopp ovanfor byen.

Queenstown er eit senter for opplevingsturisme. Skisport, jetbåt, rafting, strikkhopp, mountain biking, skateboarding, fotturar og flugefiske er aktivitetar som vert sterkt fremja.

Queenstown er eit hovudsete for vintersport på New Zealand, og folk frå heile landet og fleire delar av verda kjem for å stå på ski i dei fire fremste skisentra, Cardrona Alpine Resort, Coronet Peak, The Remarkables og Treble Cone. Langrenn er mogeleg i Waiorau Snow Farm, nær busetnaden Cardrona.

Ein kolfyrt, nesten 100 år gamal dampbåt, går turistturar på innsjøen.

Høgdepunkt

Lake Wakatipu - med det edwardianske dampskipet TSS Earnslaw.
Opplevingsturisme, jetbåtar, strikkhopp, skisport, rafting, kunstflyging, fallskjermhopping, terrengsykling og paragliding.
Ben Lomond - eit 1 748 meter høgt fjell ein lett når toppen til på nokre få timar, og der det er strålande utsikt over Lake Wakatipu og områda kring.
Ein golfrunde på Millbrook Resort - ein 150 år gammal gard, no eit fritidssenter.
Cricket og golf
Queenstown Airport ved Frankton
Skyline Gondolbane og aking
Queenstown Winter Festival
Gullgraving, Arrowtown, Central Otago historie, sauefarmar Walter Peak station.
Southern Lakes District & Milford Road, Milford Sound / Homer Tunnel, innsjøar i Fiordland / Doubtful Sound
Opptaksstadar for filmtriologien Ringdrotten
Glenorchy & Routeburn - fottur-ruter.

Vêrlag

Queenstown har eit alpint klima der vintrane byr på klår himmel og snødekte fjell. Om somrane er dagane lange og varme, og temperaturane kan nå 30°C.

**Klimatabell: Queenstown**
	Jan	Feb	Mar	Apr	Mai	Jun	Jul	Aug	Sep	Okt	Nov	Des	År
Gjennomsnittleg dagleg maksimumstemperatur	22,6°C 73°F	22,7 °C 73 °F	19,9 °C 68 °F	16,1 °C 61 °F	11,9 °C 53 °F	8,6 °C 47 °F	8,2 °C 47 °F	10,3 °C 51 °F	13,5 °C 56 °F	16,2 °C 61 °F	18,6 °C 65 °F	20,7 °C 69 °F	15,8°C 60°F
Gjennomsnittleg dagleg minimumstemperatur	10,7°C 51°F	10,6 °C 51 °F	8,8 °C 48 °F	6,2 °C 43 °F	3,3 °C 38 °F	0,7 °C 33 °F	0,1 °C 42 °F	1,3 °C 34 °F	3,6 °C 38 °F	5,6 °C 42 °F	7,4 °C 45 °F	9,4 °C 49 °F	5,6°C 42°F
Gjennomsnittleg total nedbør	78 mm 3,07 "	58 mm 2,28 "	80 mm 3,15 "	75 mm 2,95 "	89 mm 3,50 "	82 mm 3,23 "	65 mm 2,56 "	73 mm 2,87 "	69 mm 2,72 "	95 mm 3,74 "	72 mm 2,83 "	77 mm 3,03 "	913 mm 35,94 "
Kjelde: NIWA Climate Data^[3]

Kommunikasjon

Queenstown har samband via vegnett og fly, men ikkje med jarnveg.

Som turistsenter har Queenstown ei rekkje samband med buss, dei fleste for pakketurar, men der er daglege bussruter til og frå Invercargill, Dunedin og Christchurch, som er dei byane som ligg nærast Queenstown.

Flyplassen ved Queenstown har flysamband med Australia ved Air New Zealand og Qantas, særleg til Brisbane, Melbourne og Sydney, og med auke av flygingane i skisesongen. Innanlandsflygingar hit kjem frå Auckland, Wellington og Christchurch.

Queenstown Airport er den travlaste helikopterbasen på New Zealand, og er også mykje brukt av turisttrafikk til Milford Sound og Aoraki/Mount Cook, både med småfly og helikopter.

Den viktigaste transportruta til Queenstown er State Highway 6, som går frå Cromwell gjennom fjellpasset Kawarau Gorge til Frankton, der ei 9 km sidegrein (SH6A) fører fram til sentrum i byen. SH6 held fram sørover og kryssar Kawarauelva før han går ned langs austsida av Wakatipusjøen til Kingston før han kryssar grensa til regionen Southland. Ein noko vanskeleg framkomeleg veg over Crown Range fører til skisentra Cardrona og Wanaka, og er den høgast liggjande offentlege vegen på New Zealand med fast vegdekke.

Queenstown er utgangspunktet for mange dagsturar til det kjende naturområdet Milford Sound, desse tek om lag 12 timar. Som nemnt går det òg turistflygingar til Milford Sound.